
LU Līvõd institūt kubst lieudtõb sūr Nikā Polmaņ (122 x 207 cm) portrej režisor Uģis Olte tulbizõst mängfilmst “Upurga”. Foto: LI Līvõd institūt
LU līvõd institūt kubst ni um lieudtõb sūr Nikā Polmaņ (122 x 207 cm) portrej režisor Uģis Olte tulbizõst mängfilmst “Upurga”. Portrej film pierāst um tǟtõn Lāsma Olte ja sīe alīzõks um kȭlbatõd āinagi Nikā Polmaņ foto, kus ta um nǟdõb fijōlõks ja kōļ tagān pistõd kirrõks.

LU Līvõd institūt kubst lieudtõb sūr Nikā Polmaņ (122 x 207 cm) portrej režisor Uģis Olte tulbizõst mängfilmst “Upurga”. Foto: LI Līvõd institūt
Nikā Polmaņ, sindõn Vaidõl, Lōz kōrands 1823. āigast 3. maijs, vȯļ ežmi opātõd opātiji līvõd siegās, ikš ežmižist līvõkēļizt rōntõd tulktijižist. Tämmõn vȯļ tǟdzi jag 19. āigastsadā līvõd istōrijs, īžkis nei nimtõd Līvõd ilzõ nūzimiz āigal, ku līvõd kalāmīed nūziztõ Dūoņig barōn vastõ, kis tōž iļarū nustõ jelūd rent. Sīepierāst Nikān vȯļ urgõmõst eņtš sindiz Rāndast. Krišjānis Valdemārs abkõks ta sai jelām Novgorod immõrgouțs, kus 1903. āigast märtsõs ka kūoliz. Nikā Polmaņ vȯļļi eņtš skūolnikādõn opātõn, ku “rištīng vȯņ äb ūo neijen sǟl, kus um pǟgiņ viļļõ, bet sǟl, kus um mīel sieldõm ja õigõm” (Šuvcāne 2015, 56).

Uģis Olte tulbi mängfilm “Upurga”. Foto: LI Līvõd institūt
Uģis Olte tulbi mängfilm “Upurga” nīžõb iļ gid, kis mõtsāliz rubīžjoug luoiks kōtõb eņtš sõzār ja täm kolēgõd – filmimiz grup, mis um tund sīņõ reklām filmimiz pierāst. Sīes luoiks sigži ēdrikšõb äbtundtõb ilā im ja sīe joud jedst äb ūotõ kaitstõd ka kūožpēļizt, kīen um gläbdõb īžeņtš nīž.

Nikā Polmaņ portrej tulbizõst mängfilmst “Upurga”. Foto: LI Līvõd institūt
Film tīemiz āigal sīe režisorõn ja stsenarij kēratijizõn sugīz mõtk, ku ilā sallitõ kaitsijizt kūožpēļizt vīțimiz pierāst, vȯlks kȭlbatõmõst jo veitõ tundtõb līvõd mōīlmõ ja sīe motīvidi. Ikš seļļižist motīvist um ka films kaffõkuodā jags nǟdõb Nikā Polmaņ portrej. Um interesant, ku sīe foto pǟl, mis kuņštnikā kȭlbatiz, Nikā jālgad äb ūotõ nǟdõb, sīepierāst kuņštnikā um tǟtõn jaļgi nei, kui ta um mõtlõn Nikā ižēņtšta nǟmõs.
* * *
Kõlbatõd ovātõd:
Šuvcāne, Baiba. (2015). Sauc par Vaidi mūsu ciemu. Rīga: Lauku Avīze. 382 lpp.



