4. märtsõs Tartu Iļīzskūol emeritprofesōr ja Rovdvaidliz līvõ sõbrād seļtš jūodiji Tiit-Rein Viitso pivāstõb eņtš 80. sindiztpäuvõ. Tämpõ ta um amā paŗīmi līvõ kīel tundiji mōīlmas ja 2012. āigasts ulzõ tund līvõkīel–ēstikīel–lețkīel sõnārōntõ – amā sūr līvõ sõnāvīļa ovāt – kubbõsǟdiji. Tiit-Rein äb ūo ser sūr tiedmīez īd, ta um ka imli rištīng, ja iļ sīe tämmõn sūr sūr tienū! Mäd tarmimizt lūol sõnād sizzõl um pannõd Valt Ernštreit.

Tiit-Rein Viitso.

Amā paŗīmi līvõd profesor

um Tiit-Rein Viitso –

ta amā paŗīmstiz tuņšlõb kīeldõ,

amā paŗīmstiz tītštõb.

 

Vaņḑi sõņḑi ta tīedab,

ūži sõņdi ta lūob;

eņtš nōļadõks īd jegāīdõn

muidlimiz palgõ tūob.

 

Väzzõndõn āndab ta kätā;

kovāldõn – jõvā nõv;

äbțõb vōjliztõn ädās;

ta um līvõkīel nugār ja tõv –

ailõb pids randõ kierdõ,

kilāst killõ ja vel

nägțõb ta pimdõms sieldõmt,

až vagāks īeb līvõkīel ēļ.

 

Sūr tienū, Tiit-Rein, iļ amā,

mis sa ūod tämpizt līvliztõn tarmõn –

amā ežmõks īžēņtšta,

bet ka kovālõzt, ukūzt ja armõ.

 

Vȯndzizt sindiztpäuvõ

sinnõn, ja tīeratõ, joudõ –

tarmõb sin kultūr sidām,

ja amād munt līvõd rovd.